Ladka Ya Bhoot?

Yeh baat qareeb 2 saal purani hai,ek baar main apne relation ki kisi shaadi mein gya hua tha Baraat se wapas aate waqt raat ke qareeb 1.30 baj gye the main apni bike se wapas aa rha tha raaste bilkul sunsaan tha aur zordar thand pad rhi thi aur kohra bhi bohat tha raasta bilkul dikhayi nahi de rha tha abhi main thodi door hi aaya tha ki achanak meri bike ki head-light kharaab ho gyi aas paas koi  ghar bhi nahi tha roshni ka kahin naam nahi tha bas chaand ki halki si roshni thi,main pareshan ho gya aur darr bhi lag rha tha mujhe khud pe gussa aa rhi thi ki main itni raar mein vahan se nikla hi kyun? Mujhe subah tak ruk jaana chahiye tha baraat ke kuch log thand ki vajah se vahan ruk gye the aur subah aane ka plan kiya tha lekin meri hi kismet kharaab thi khair ab karta bhi kya isliye bike slow speed mein chalate hue dheere dheere aage badhne laga kuch door chalne ke baad kohra aur Ghana ho gya tabhi mujhe raaste par bilkul bike ke saamne achanak se ek ladka dikhayi diya jiski age qareeb 13 ya 14 saal ki rhi hogi usne ek white kurta aur ek topi pahni hui thi usne mujhe rukne ka ishaara kiya maine bike rok di aur uski taraf dekha andhere ki vajah se kuch saaf nahi dikh rha tha uss ladke ke ghane baal the aur vo bohat masoom lag rha tha..

Maine usse poocha ki tum itni raat mein yahan kya kar rhe ho? Tumhara naam kya hai?? Lekin usne koi jawaab nahi  diya vo bas chup chaap khada tha aur meri taraf dekh rha tha…

Mujhe uspe daya aayi aur maine usse kaha ki bike par baith jao subah tumhe tumhare ghar chhod dunga vo chupchaap aage badha aur meri bike par baith gya maine bike start ki aur ghar ki taraf badha,bike start karte hi bike ki head-light sahi ho gyi rasta saaf dikhayi dene laga main khushi se peeche ghooma uss ladke ko batane ke liye ki dekho jaise hi tum bike par baithe bike ki Head-light sahi ho gyi,lekin peeche ghoomte hi main shock ho gya vo ladka peeche nahi tha maine bike roki idhar udhar dekha lekin ladka kahin nahi tha main darr se kaanp gya mere haath paanv thande ho gye maine fauran bike start ki aur vahan se full speed mein ghar ki taraf bhaaga raat bhar mujhe theek se neend nahi aayi..

Subah ko maine apne ghar vaalon se saari baatein batayi lekin kisi ne yaqeen nahi kiya,

Kuch dinon ke baad main kuch kaam se fir ussi raste se guzra jis raaste par mujhe vo ladka mila tha maine ek chai ki dukaan par bike roki aur chai peene laga aur uss ladke ke bare mein soch rha tha tabhi mere paas baithe ek buzurg shaqs ne mujhse poocha ki aap kuch pareshan lag rhe hain??

Maine uss raat ki saari ghatna unhein batayi ye sun ke vo mujhe dekh kar muskurane lage aur kaha ye sirf tumhare saath nahi hua hai bohat se logon ke saath aisa ho chuka hai.. aur fir aage bataya ki kaafi waqt pahle yahan ek cycle ki choti si dukaan thi jismein vo ladka kaam karta tha vo bohat gareeb tha vo hamesha doosron ki help karta tha uski ek boodhi maa bhi thi lekin kuch saal pahle kisi beemari ki vajah se uss ladke ki maut (death) ho gyi aur ussi gham mein uski boodhi maa bhi marr gyi vo dukaan ab band ho chuki hai lekin vo ladka aaj bhi doosron ki Help karta hai..ye sun kar mujhe bohat acha mehsoos hua uss raat ki ghatna se jo darr dil mein bass gya tha vo bilkul khatam ho gya….

Gopal Shukla,Kanpur

Kutte ka Rahasya

Ye baat 3 saal pahle ki hai,shaher ke kinare par mere papa ki Mithaiyon (sweets)ki dukaan thi,Dukaan kya aap restaurant keh sakte hain,

Aur dukaan ke theek peeche hi shamshan-ghaat tha dukaan railwy line se kuch hi doori par thi.

Mere Papa ki dukaan soot mill ke paas hone se vahan ke mjdoor (labours) dukaan par bohat aate the aur jalebiyan aur samose etc. khaate the vo ilaaka kaafi sunsan rehta hai lekin mill ki vajah se vahan kaafi chahal-pahal rehti hai aur Papa ki dukaan bhi achi chalti thi.

Ek din ki baat hai mere Papa ne jalebiyan tayyar karke rakh di thi aur samone banana ki tayyari kar rhe the dukaan par uss waqt koi nahi tha qareeb 12 baje ka time rha hoga,

Tabhi vahan ek kaala sa bohat hi bada kutta aaya uski size aam kutton se kaafi badi thi vo Papa ko ghoorne laga Papa darr gye Kutta Papa ke aur qareb aaya aur paas mein rakhi hui Jalebi ko jaldi jaldi khaane laga, Papa ne darted darte kutte ko bhagane ke liye danda uthaya aur use bhagane ki koshish karne lage  kutte ne Papa ki taraf dekha uski aankhein bilkul khoon ki tarah  laal thi aur daant bohat bade the jise dekh kar Papa ka rom-rom kaanp gya Papa ne kisi ko help ke liye bulana chaha lekin uss waqt vahan koi nahi tha,Papa chup-chaap khade dekhte rahe unhein darr tha ki agar vo hile bhi to vo kutta unpar hamla kar deta,

Dekhte hi dekhte vo kutta saari jalebiyan kha gya aur fir Shamshan-Ghaat ki taraf bhaaga Papa bhi uske peeche bhaage vo jab Shamshan-Ghat pahuncha to ek peepal ke Ped ke paas ruk gya Papa kutte se kuh doori par the aur Papa bhi ek Ped ke peeche chhup gye aur kutte ko dekhne lage,

Achanak se Kutta uss Peepal ke Ped ke oopar chadha aur Gayab ho gya..

Papa ye sab dekh kar bohat darr gye unhein 3 din tak tez bukhaar tha aur sahi hone par Papa ne apni dukaan doosri jagah shift kar li..

Sabiha Firdaus,Barabanki,U.P

Udhaari Ka Khaamiyaza

 Mere Ghar ke kuch doori par ek sajjan rehte hain jinka naam avinash hai hamare ghar se unka kaafi aana jaana bhi hai,kuch din pahle unki wife ki death ho gyi thi..

5 saal ke andar unke khaandaan(Kul) ke kam se kam 7 logon ki death ho chuki thi unki wife ki death ke kuch dinon ke baad unki ek beti thi vo bhi bohat kamzor aur Bemar ho gyi thi avinash ji ne uska bohat ilaaj karaya bohat se Doctors ko dikhaya lekin koi faayda nahi hua uski halat bigadti hi ja rhi thi aas paas ke logon ne avinash ji ko kisi taantrik ya pandit se milne ki advice di,

Lekin avinash ji ko inn sab baaton par bharosa nahi tha lekin Beti ki zindagi ka sawaal tha ye soch kar thak haar kar ek taantrik se milne ka decide kiya!

Avinash ji ne taantrik ko saari baatein batayi aur apni Beti ke baare mein bhi bataya jo ki bohat beemar rehti thi tantrik ne beti ko saath laaane ko kaha,

Avinash ji apni Beti ko saath le kar taantrik ke paas gaye taantrik ne bataya ki-kisi Devi ya Devta ki udhaari tumhare khandaan(Kul) par baaki reh gyi hai uska khamiyaza ye ladki jhel rhi hai aapke Khandaan(Kul) mein kisi ki Maut(death) ke baad uska kaam-kaaj(Kriya-Karam) adhoora reh gya hai isi vajah se tumhare khandaan(Kul) ke logon ki maut (death) ho rhi hai,taantrik ne ek Havan (Pooja) jaisa  kuch karam kaand-karne ki salaah di aur kaha ki main ye Pooja karke uss Bhatakti aatma ko bulaunga aur usse shaant kar dunga jisse sab sahi ho jaega,

Lekin Avinash ji ko inn sab baaton par yaqeen nahi hua unhein ye sab andh-vishwaas laga aur Taantrik ke paas se vapas aa gye,

Do mahine(months) ke baad unki Beti ki bhi Maut ho gyi aur uske kuch dinon ke baad unke Bete ki halat bhi bilkul unki Beti jaisi ho gyi Unka Ladka Beaamar rahne laga..

Avinash ji fauran apne Bete ko lekar usi Taantrik ke paas gya aur Taantrik ki bataye huyi zarooraton ko poora kiya Taantrik ne Shamsaan Ghat pe Pooja-Havan kiya aur saari vidhiyan poori ki....

Agle hi din se unke Bete ki halat mein sudhaar hone laga aur kuch dinon mein unka beta bilkul theek ho gya pahle ki tarah... 

Iss baat ko aaj 3 saal guzar chuke hain aaj Avinash ji sukhi Jivan beeta rahe hain aur maut ka silsila bhi ruk chuka hai unhein bas ek hi baat ka afsos hai ki ye kaam unhone agar pahle kiya hota to aur zindagiyan bach jaati..

Sunil Kumar Yadav,Unnav U.P

Bhoot-Bachcha

ye baat bohat puraani hai meri ammi ne mujhe batayi thi aur main aapse share kar rha hun..
Ye incident meri ammi ke mamu ke saath hua tha.
qareeb 40 saal pahle  ki baat hai meri ammi ke maamu raat mein apni dukaan se ghar ki taraf aa rhe the uss waqt itni zyaada abaadi(population) nahi thi bohat door door pe ghar hua karte the raaste  bhi raat mein veeran hi rehte the door door tak koi aadmi nazar nahi aata tha aur raat mein to bilkul nahi vo roz ki tarah apni cycle se ghar ki taraf jaa rhe the chaand ki halki si roshni thi..
vo abhi aadhe raaste tak hi pahunche the ki unhe ek bachche ke rone ki awaaz sunayi di unhone fauran cycle rok di aur aas paas dekhne lage aur cycle se utar kar jidhar se rone ki awaaz aa rhi thi uss taraf gye road ke dono side ghane ped paudhe aur jhaadiyan thi, vo awaaz ek ped ke peeche se aa rhi thi unhone ja kr uss ped k peeche dekha to vahan ek 4-5 saal ka bachcha khada tha uss bachche ne kuch bhi nahi pehnaa tha uss bache ka sar aur bachon ke hisaab se thoda bada tha mamu ko dekh kar uss bache ne rona band kar diya aur apni badi badi aankhon se unhein dekhne laga ammi ke mamu ko uss bache par taras aa gyi aur socha shayad ye bachcha bhatakte hue yahan aa gya ho abhi ise apne saath ghar le chalta hun subah iske maa baap ka kuch pata lagaunga,
Aur mamu ne uss bache ko uthaya aur apne saath cycle par peeche baitha kar ghar ki taraf chalne ka iraada kiya lekin unki cycle chal nahi rhi thi kaafi zor laga kar unhone thodi door cycle chalayi aur paseene se bheeg gye aur cycle rok kar peeche baithe bachche ki taraf dekha vo maze se baitha hua tha
fir achanak  mamu ki nazar bachche ke pairon par padi uss bachche ka ek pair kaafi mota ho gya tha aur  itna lamba tha ki jahan se mamu ne bchche ko uthaya tha vahan tak  tha,ye dekhte hi mamu darr se kaanp gye aur fauran hi ek jhatke mein bacche ko cycle se dhakka maar kar neeche gira diya aur Ayat-al-Kursi padhte hue ghar ki taraf poori jaan laga kar cycle bhagaayi aur ek baar bhi peeche mud kar nahi dekha...

Hum aaj bhi ammi se ye kahani sunane ko kehte hain..

Danish,Khalilabad

Din ka Bhoot

ye baat mere gaanv ki hai jise 12 saal beet chuke hain,
hamare gaanv ka ek aadmi paidal doosre gaaanv ja rha tha road se jaane mein kaafi waqt lagta hai lekin ek shortcut bhi hai jo jungle se hoakr guzarta hai aur uski doori 2km. ke qareeb hai.
vo aadmi chalte hue jungle ke beech mein pahuncha to vahan kuch log baithi hue the aur un logon ne aadmi ko apne paas bulaya aur poocha, kya tum mujhe pehchante ho?
aadmi bola-Nahi! main tumhe nahi pehchaanta
iss par unlogon ne uss aadmi se kaha ki agar tum mujhe nahi pehchante to mujhse lado nahi to hum tumhe maar denag aur agar tum ladai mein jeet jaate ho to hum tumhe nahi maarenge tum apne raste chale jaana,
lekin vo aadmi ladna nahi chahta tha isliye vahan se jaane laga vo jaise hi jaane ke liye ghooma vo log fir se uske saamne khade the vo jidhar bhi ghoomta uske ghoomne se pahle vo log vahan maujood hote the vo pareshan ho gya aur aakhir mein unse ladne ke liye ready ho gya.
vo log jab aadmi ko maarte the to usko chot lagti thi lekin jab aadmi unn log ko maarta to unhein nahi lagti thi jaise vahan koi ho hi naa vo sab ek saaya the uska haath un logon ki body ke aar paar chala jaata tha unn dono ne aadmi ko bohat maara peeta aadmi behosh ho gya kuch der baad usse hosh aaya to vo girte padte hue jungle se bahar aaya khet mein kaam karte hue kuch logon ki nazar aadmi par padi unhone aadmi ko uske ghar pahunchaya uski poori body par chot ke nishan the..
ek din baad vo aadmi marr gya uski death ho gyi...marne se pahle usne saari baatein gaanv valon ko bata di thi uske baad se uss jungle ke raaste par koi nahi jaata.

Surendra Pratap,Envan,Gorakhpur

PURVA-BHAS (THE FOREBODING)

Yeh baat 10 saal pahle ki hai,ek subah main ghabra ke neend se jaagi main ek khwaab dekh rhi thi,maine  khwaab mein dekha ki ek chota sa gol-matol sa bachcha ek paani se bhari baalti(bucket) ke paas khada hua hai dekhte hi dekhte vo bacha baalti ki taraf jhukta hai aur apne sar ke bal ulta usmein gir jaata uska sar paani se bhari baalti mein tha aur paanv oopar tha aur girkar marr jaata hai,
fir achanak se khwaab mein mere Dadaji aaye jinka nidhan (Death) ko tab lagbhag 20 saal guzar chuke the, khwaab mein unka rang peela pada hua tha vo bohat pareshan lag rhe the,
Maine unse poocha kya hua bauji aap dukhi kyun hain?
Unhone meri taraf udaas nazron se dekhte hue kaha ki-Ye acha nahi hua!
Bas usi waqt meri neend khul gyi,kuch der tak main iss khwaab ke baare mein sochti rahi lekin kuch samajh nahi aaya kyunki hamare poore Parivaar mein koi itna chota bachcha tha hi nahi jiski main fikar karti aur Dadaji ka khwaab to main aksar dekha karti thi,kyunki vo mujhe bahot pyaar karte the mera Bachpan unke saaath hi beeta tha, lekin isse pahle vo mere khwaab mein kabhi pareshaan ho kar nahi dikhe,fir maine socha ki ye to bas ek sapna tha aur jaldi sab bhool kar main apne kaam mein busy ho gyi..
Aur ussi shaam mein mujhe ek shock kar dene vaali khabar mili ki mere Bhatije (cousin ka beta) jo ki 10th mein padhta tha uski swimming-pool mein doobne se maut(death) ho gyi hai..ye khabar sunte hi mujhe apna subah ka khwaab ek baar fir jaagti aankhon ke saamne ghoom gya.
Mere cousin ka beta bhi  gol-matol sa bohat hi pyaara bachcha tha,aur hamre parivaar ka sabse chota member tha yaani ki Dadaji ka sabse chota pota,
jis din mere bhatije ki death hui vo swimming seekhne gya tha swimming seekhte huve usse abhi 2-4 din hi hua tha uss din paani mein Dive karte hue uska sar pool mein neeche takra gya tha jisse uski doobne se death ho gyi thi.
Subah jiss khwaab ka koi matlab samajh nahi aa rha tha shaam tak vo khwaab haqeeqat ban chuka tha..

Rita Kashyap,Delhi

BHAI NE BACHA LIYA

Har roz ki tarah hum log apna apna bistar laga kar so gye,lagbhag aadhi raat guzri thi ki mujhe mehsoos hua jaise koi mere seene ke oopar baitha hua hai aur mere haath aur paanv ko jakad kar mera gala daba rha hai,uski pakad itni mazboot thi ki main hil bhi nahi paa rha tha aur naa hi main chilla pa rha tha main koshish to bohat kar rha tha chillane ki lekin mere muh se awaaz jaise nikal hi nahi rhi thi,kuch der mein mera dum ghootne laga aisa lag rha tha jaise ab main marr jaunga meri aankhon se aansu nikal rhe the aur meri poori body paseene se bheeg gyi thi tabhi maine mann mein Hanuman Chalisa japna shuru kiya aur achanak se uski pakad kamzor padne lagi aur tabhi main zor se cheekha mere bed ke paas mera bhai so rha tha,meri cheekh ki vajah se uski aankhein khul gyi aur usne mujhe pahle awaaz di uski awaaz mujhe sunayi de rhi thi lekin main kuch response nahi kar paa rha tha jab maine koi response nahi diya to usne mujhe zor zor se hilana shuru kiya uske hilaane se dheere dheere main normal hua..uss din mere bhai ne meri jaan bacha li..

Aakash Pandey,Gorakhpur

Shaitan ke Naakhoon

April,2011 ki baat hai main har roz ki tarah khaana kha ke so gya main unn dinon subah walk ke liye jaaya karta tha meri neend 3.30 baje ke aas paas khuli maine apne room se joki 1st floor pe tha neche aaya aur walk ke liye chala gya..
Aur walk ke baad ghar aaya aur fresh ho kar nahane ke liye chala gya shirt nikaali to ussi waqt mere bhai Amit mere room mein aa gya aur aur bola ki bhai ye tumhare seene (chest) par nishaan kaisa hai maine mirror mein dekh to ghabra gya aur darr bhi gya vo ajeeb sa nishaan tha jaise kisi ne apne nakhoon zor se dhansa diye ho,
Mere bhai Amit ne ye baat mere Dada ji ko batayi unhone mujhe bulaya aur nishaan dikhaane ko kaha, maine unhe dikhaaya unhone kaha ye Shaitaan ke naakhoon hain ye koi sign hai, main ye sun kar aur darr gya aur tabhi achanak mujhe apne raat ka  khawaab yaad aaya jo ki mujhe theek se yaad nahi, bas itna yaad hai koi Kaale rang ka aadmi mere seene par baitha hua tha aur apne nakhoon mere seene mein ghusa rha tha aur mere ye nishaan exactly usi jagah pe the jahan uss kaale rang ke aadmi ne ghusaaye the..
main ye sab soch ke kaafi darr gya
vo nishaan aaj bhi halka sa mere seene par maujood hai main jab bhi unhein dekhta hun to vo khwaab mujhe yaad aa jaata hai aur main darr jaata hun.

Golu,Bhairavpur

Shamshan Ghaat

Baat lagbhag 6 saal pahle ki hai,main aur mere mata-pita ji aur mere 2 bhai bahen gaanv mein rehte the hamare gaanv ka naam Dhodvapur hai ye Raibareli District  mein aata hai,

hamara ghar  gaanv se bahar tha jahan ek Shamshan Ghaat tha..

Hum sab chahe Garmi ho ya thand ghar ke bahar Chhappar mein hi sote the,

Ek baar ki baat hai mere Piaji kisi kaam se gaanv se bahar gye hue the main meri maa aur bahen vahin ghar pe hi the,

raat ko jab tarah tarah ki ajeeb si awazein sunayi deti thi jo ki aksar hi sunayi deti thi to maa kehti ki ye kuch nahi hai ye to ek chidiya (Bird) hai jo aisi awaaz karti hai.ye sun kar hum log ka darr door hi jaata tha aur humlog be-khauf ho kar aaram se so jaaya karte the lekin raat mein hamari maa hamari dekh bhaal ke liye soti kam aur jaagti zyaada thi..humein sab kuch Normal lagta tha lekin mere ptaji aur maa hamesha isghar ko change karne ki baatein kiya karte the lekin pitaji ke kaam ki vajah se aisa karna sambhav nahi tha.

jis raat pitaji bahar gye hue the to raat mein fir vahi awaazein sunayi di aur fir maa ne humein vahi batay jaisa vo hamesha batati thi ki vo chidiya (Birds) hain,aur hum so gye aur maa jag rhi  thi kuch der baad maa ki bhi aankh la gyi aur vo so gyi,

raat ko lagbhag ek baje maa ko laga jaise koi unke oopar zor zor se kood rha hai maa ekdum se ghabra gyi aur aankh kholi to saamne ek bilkul kaale (Black) rang ka ek bacha tha jo maa ke oopar kood rha tha maa ne chillana chaha lekin unki awaaz nahi nikal rhi thi fir maa ne jaldi se mann mein hi Hanuman Chalisa padhna shuru kiya aur aisa karte hi jo koi unke oopar kood rha tha vo door ja ke gira jaise hi vo gira maa ne zor se chillaya aur uss awaaz se meri aankh khul gyi maine dekha ki maa bohat dari hui hai aur zor zor se saansein le rhi hain,

Maine jaldi se maa ko pahle paani diya aur unka haath sehlaane laga kuch der baad jab maa Normal hui to maine poocha kya hua tha??

Unhone kaha ki koi bura sapna dekha tha aur mujhe sach nahi bataya aur kaha ab so jao,main bhi so jaati hun.

uss ghatna ke baad 2-3 saal tak hum vahin rahe fir mere piataji ne doosri jagah kaam start kar diya aur hum sab Kanpur mein rehne lage tab ek din maa ne mujhe uss raat  ki aur uss ghar ki sab baatein sach sach batayi aur kaha vo sapna nahi tha haqeeqat thi..

Hum sabhi ye sun kar shock reh gye ki hum bhooton ke beech rehte the...

Satendra Kumar,U.P

Peepal ke Ped ka Bhoot

Ye baat kuch saal pahle ki hai,main thand ki vacations mein apne nana ke ghar gyi hui thi,mere nana ek home-guard the vo kaafi raat tak duty karte the,

ek raat ki baat hai mere nana duty khatam karke qareeb 12 baje ghar aa rhe the ghar ke saamne hi ek bohat bada peepal ka ped tha nana ne dekha ki vahan par koi baitha hua hai andhera hone ki vajah se kuch saaf saaf nahi dikh rha tha bas ek saaya sa dikh rha tha jo ki apna sar apne ghutnon ke bech mein daal ke baitha hua tha,

Nana ko laga ki shayad koi chor hai unhone kaha kaun ho tum? yahan kyun baithe ho?

thodi der tak vo baitha sunta rha aur kuch nahi bola nana ke paas hamesha ek danda rehta tha unhone uss dande ko zameen pe maara lekin fir bhi vo vahan se nhi gya ab nana thoda darr gye the thodi der baad nana ne fir kaha ki yahan se jaate ho ya main aaun? usne fauran bola- AAO YAHAN AAO!! uski awaaz kaafi bhayanak thi nana ne apna torch nikala aur thoda aage badh ke uske oopar jaalaya aur dekha ki usne koi kapde nahi pahnein hain vo bilkul nanga baitha hua tha fir nana ne jab uske paanv ki taraf torch kiya to dekha ki uss aadmi ke Paanv ulte the matlab peeche ki taraf the!

ye dekh kr nana bohat hi zyaada darr gye aur bhaag kar ghar mein aaye aur sabko jaga kar ye baat batayi kisi ne bahar jaane ki himmat nahi ki aur raat bhar koi theek se so nahi saka.

Subah nana ko tez bukhaar tha aur vo 2 dino tak darr ki vajah se bukhaar mein rahe..

Nana ne jab ye bataya to main bhi vahan thi aur sun rhi thi jise main aaj share kar rhi hun.

Tripti Sharma,Kanpur

Vo Faansi

Ye baat lagbhag 2 saal pahle ki hai,hamare ghar ke paas ek aurat ne faansi laga li thi.
uss din se aas paas ke log darne lage the unka kehna tha ki vo aurat unhe dikhayi deti hai,,mujhe inn sab baaton pe kabhi vishwaas nahi tha main aisi baaton ka mazak udaata tha,
unhi dinon ki baat hai  main roz ki tarah raat mein tv dekh rha tha aur hamesha ki tarah sab ghar ke log so chuke the main akela jag rha tha mere bedroom ka door khula hua tha jismein se lobby mein jaane ka rasta tha tabhi meri nazar lobby ki taraf gyi,maine dekha ki lobby mein ek aurat red colour ki saari pahen kar kadhi,mujhe dekh rhi hai main bohat hi zyaada dar gya aur hanuman chalisa padhne laga vo aurat dheere dheere mere bedroom mein aayi aur mere paas baithi maine apna T.V off kar diya jisse bedroom mein andhera ho gya aur darr ki vajah se  maine apne oopar chadar(bed sheet) daa li aur prayer karne laga... aur kuch der baad ussi halat mein main so gya.
Subah uth kar maine apne gharvaalon ko raat ke baare mein bataya to kisi ne yaqeen nahi kiya aur hasne lage unhone kaha ki tumne zaroor koi sapna(night-mare) dekha hoga,
uss din ke baad se vo aurat mujhe  lagbhag 6 mahine tak dikhayi deti rahi..na vo mujhse kuch kehti thi aur na koi nuksaan hi pahunchati thi bas jaise vo apni maujoodgi ka ehsaas dilana chahti thi vo vahi aurat thi jo hamare pados mein rehti thi aur faansi laga ke marr chuki thi usne mujhe bohat daraya tha aur yaqeen karaya tha ki bhoot sach mein hote hain..aaj bhi jab main un dinon ke baare mein sochta hun to darr jaata hun vo meri zindagi ke sabse kahufnaak din the ab sab kuch sahi hai iss baat ko ek saal se zyaada time ho  chuka hai lekin vo fir mujhe kabhi dikhayi nahi di...na hi main samajh paaya ki vo mujhe kyun dikhayi deti thi?

Lalilt Soori,Shahdara

Jalta Bargad Ka Ped(The Burning Banyan Tree)

 20 saal pahle ki baat hai,mere pitaji aur unke ek dost raat 1 baje ke qareeb ek shaadi attend karke aa rhe the vo thand ki ek khaufnaak raat thi ,mere pitaji raat mein kahin aane jaane se darte nahi the aur bhoot pret par vishwas nahi karte the,lekin unke dost bohat darpok insaan the aur bhoot,pret,aatmaon aur aisi cheezon par vishwas karte the unke dost ne bohat baar mere pitaji ko mana kiya ki suabh chalte hain raat kaafi ho gyi hai aur vo raasta bhi kaafi sunsan aur bhayanak hai,
lekin mere pitaji ke zyada kehne ki vajah se unke dost raat mein aane ko ready ho gye,aur sawari ya bike na hone ki vajah se ve log paidal hi nikal pade ghar ka raasta qareeb 10 km. ki doori par tha,uss waqt log paidal hi kaafi door door ka safar kar lete the...
raaste mein pitaji ke dost tarah-tarah ki daraavni aur bhooton ki baatein kar rhe the aur darr bhi rhe the,
mere pitaji ne unhe samjhaya ki, kuch nahi hoga daro mat!
beech raaste mein andhera aur ghana kohra(fog) hone ki vajah se kuch dikhayi nahi de rha tha, achanak saamne ek bohat bada Bargad ka ped(tree) dikha jis par ek chiraag jal rha tha...ye dekh kar pitaji ke dost chilla uthe aur vapas jaane ko kehne lage lekin piataji nahi maane aur kaha- ki main itna door aa gya hun to vapas nahi jaunga..
aur apne dost se kaha ki tum apni aankhein band kar lo main tumhara haath pakad kar le chalunga, tum aankhein mat kholna aur darna mat,fir jaise jaise piataji aage badhe chiraag ki aag ne poore ped ko dheere dheere gher liya aur dekhte dekhte poora bargad ka ped jalne laga aur chaaron taraf door door tak ujaala ho gya lekin kahin koi gaanv nahi tha na koi ghar na koi insaan fir bhi pitaji dare nahi aur kuch door jaane par peeche mud kar dekha to kuch bhi nahi tha sab normal ho gya tha ...
ghar tak aate aate pitaji ke dost behosh(faint) ho gye aur kaafi dino tak beemaar rahe....
ye baat jab pitaji ne humein batayi to hum bhi bohat darr gye the aur uss din ke baad se mere pitaji ko bhi bhhoton par vishwas ho gya..aur kyun na hota????

Surendra Pratap,Gorakhpur,U.P

Meri Saheli Bhoot

Meri Saheli Bhoot-

Bahut si daravni kahaniyan aapne suni hongi aur bhooton ke baare mein bhi suna hoga ki bhoot hote hain ya nahi?haan! bhoot hote hain maine unhein dekha hi nahi unke sath time bhi bitaya hai.

Jab main class 5th mein thi to meri ek saheli Neha thi vo meri achi dost thi mere exam khatam ho gye the aur vacations start ho gyi thi,

ek din meri saheli neha aayi, usne kaha-chalo hum kahin ghoomne chalte hain, hum ghoomne lage .

thodi der baad tez baarish shuru ho gyi,jab maine uski taraf dekha to vo baarish mein naach rhi thi usse baarish achi lagti thi main bhi uski taraf gyi,aur hum dono bheegne lage aur kaafi bheg gye fir hum dono ghar laut aaye aurhumne kapde change kiye usne mere kapde pahnein aur apne ghar chali gyi.Qareeb 5 din guzarne ke baad pata nahi kyun  mujhe usse milne ka mann kiya aur main zidd karke apni mummy ke sath uske ghar gyi, kuch der meri mummy neha ki mummy se baat karti rhi but Neha nahi dikhi to maine uski mummy se poocha ki neha kahan hai?Vo dikh nahi rhi?

achanak se uski mummy buri tarah se rone lagin aur unhone bataya ki Neha 2 month pahle bohat beemar padi thi aur ussi halat mein uski death ho gyi..

Main ye sun ke shock ho gyi,maine  unse bataya ki 5 din pahle to Neha mere ghar aayi thi aur hum dono ne khoob masti ki aur baarish mein nahaya bhi aur bheegne ki vajah se usne apne kapde mere yahan rakh diye the(jo ki main sath le kar ayi thi) aur maine vo kapde uski mummy ko de diye..

Aur uski mummy vo kapde dekh kar rone lagi aur bataya ki jab Neha ki death hui thi uss waqt Neha ne yahi kapde pahnein the........

(Vo din mere liye sabse zyaada darne ka din tha kyunki maine ek bhoot ke saath time guzara tha lekin main pehchaan na saki ki vo bhoot thi. ye incident sabko bataein kya pata shayad kisi aur ke saath aisa incident hua ho?

Jyoti Sharma,Kanpur