Dosti Ki Nishaani

Mera Naam Ravinder hai jo ghatna main aapko batane ja rha hun vo mere chachi ke sath ghati thi,ye ghatna unke gaanv ki hai aur kaafi samay pahle ki hai uss samay ki jab unke gaanv mein light(Electricity) bhi nahi thi.
Meri chachi ki ek saheli thi jiska naam Savitri tha meri chachi aur Savitri ke beech bohat gehri dosti thi vo hamesha saath saath hi rehti thi kyunki vo dono ek gaanv mein hi rehti thi vo apne khilone(Toys) aur bohat sari chezein ek doosre se share karte the.
Aur ise sanyog hi keh sakte hain ki unn dono ki shadi bhi ek hi gaanv mein hi hui lekin ek ajeeb ghatna ne meri chachi ko hila ke rakh diya,Shadi ke qareeb ek saal baad achanak Savitri ki death ho gyi, iss ghatna ka meri chachi ke oopar bohat bura asar hua unki health kharaab hone lagi vo hamesha beemar rehti yahan tak ki unhone khaana peena tak chhod diya tha sabko yahi lagta tha ki Savitri ki maut ke sadme ki vajah se aisa ho rha hai aur kuch dino mein sab theek ho jaega.. lekin chachi ki haalat har din bigadti hi jar hi thi aur unhein Savitri ke khawaab dikhayi dete jismein Savitri unhein darati thi, chachi raat mein cheekhti thi aur batati ki unhone fir se Savitri ka sapna dekha,Kuch dino baad to unhe savitri apne saamne baithi hui dikhayi deti kabhi vo unke paas leti rehti aur chchi use dekh ke darr jaati..
Ye silsila lagbhag ek mahine tak chala meri chachi bilkul kamzor ho gyi thi unka chalna firna bhi mushqil ho gya tha vo apne Sasurl se vapas apne ghar aa gyi thi lekin Savitri ne unka peecha yahan bhi nahi chhoda vo chachi ko hamesha pareshan karti rehti thi. Unke ghar vaalon ne chachi ko shaher le ja kar bohat se Doctors ko dikhaya lekin kuch faayda nahi hua..
Fir Gaanv ke aadmi ne kisi Taantrik ko dikhaane ki salaah di aur ek Taantrik ka address diya chachi chalne firne ki haalat mein nahi thi isliye Taantrik ko unke ghar par hi bulaya gya usne poori baat suni aur raat mein 12 baje aag jal kar ek Havan kiya jismein chachi bhi thi Taantrik ne Savitri ki aatma ko bulaya aur use baat bhi ki Taantrik ne savitri ki aatma se chachi ka peecha chodne ko kaha lekin uski aatam ne baat na maani aur kaha ki main ise apne saath le kar hi jaungi jab tak ye marr nahi jaati main iska peecha nahi chodungi..
Havan ke baad Taantrik ne chachi se poocha ki- Savitri ki koi cheez kya abhi iss waqt bhi tumhare paas ya tumhari body par hai?
Chachi ne bataya ki, haan- Bohat pahle Savitri ne apne Haath ke Kangan mujhe diye aur maine apne Kangan Savitri ko diye the humne ek doosre ko dosti ki nishani ke roop mein apne apne kangan diye the aur vo kangan aaj bhi mere haath mein maujood hain main hamesha ise pahne rehti hun..
Taantrik ne vo Kangan nikaalne ko kaha aur bataya ki iss Kangan ko kisi aisi Gandi jagah par Phenk do jahan se fir koi ise utha na paaye..
Ghar vaalon ne bilkul aisa hi kiya, uske baad se Savitri ne kabhi Chachi ko pareshan nahi kiya iss Ghatna ko bohat waqt guzar chuka hai aur aaj chachi bilkul theek thaak hain lekin unhein ye baat ache se pata hai ki bhooton ki bhi pehchaan hoti hai unka bhi ehsaas hota hai Really Bhoot hote hain…..
Ravinder Lal Shah, (Uttarakhand).

Ek Shart…

Ek Shart…
Ye Ghatna Kaafi purani hai mere Nana ne mujhe batayi thi,Mere Nana ka ghar Gorakhpur mein hai baat uss waqt ki hai jab Gorakhpur itna Develop nahi hua tha Bohat kam abaadi thi door door par ghar hua karte the Raat ko koi jaldi ghar se bahar nahi nikalta tha..
Garmi ka mausam tha mere Nana aur unn ke Kuch dost baithe baatein kar rahe the baaton baaton mein bhoot shaitaan ka zikr hone laga, unke doston ne bataya ki unke ghar ke peeche vaali gali jo ki aage jaa kar baandh pe milti thi aur baandh ke raaste jo road gyi hui thi uss road par bhooton ka saya tha aur raat mein darawni awazein bhi aati thi vahan raat mein koi nahi jaata tha vahan door door tak koi ghar nahi tha ek purani factory thi jo ki bohat pahle band ho chuki thi, kyun band hui thi ye koi nahi jaanta vahan raat mein hi nahi ,aaj bhi din mein bhi jaane se darr lagta hai..
Mere Nana “Aligarh Muslim University” mein padhai karte the aur vacations mein Gorakhpur aaye hue the unke Doston ne ye baatein jab Nana ko batayi to Nana hansne lage Nana ko unki baaton par yaqeen nahi hua, Unhone kaha aisa kuch bhi nahi hota, Bhoot hamare Dimaag mein hota hai iska asal zindagi mein koi wajood nahi hai baat aur aage badhi,Mere Nana ke dost apni baat par zor dete rahe aur mere Nana apni baat par zor dete rahe..iska nateeja kuch yun nikla- Ki mere Nana aur unke doston ke beech ek Shart(bet) lag gyi aur vo shart(bet) ye thi ki mere Nana ko raat mein 12 baje uss gali se hote hue Baandh vaali road par jaana tha,aur aage jaate hue doosri road jo ki ghar ki taraf aati thi uss road se vapas ghar aana tha…
Mere Nana ye baat maan gye unke doston ne unhein mana kiya aur naa jaane ki salaah di but mere Nana nahi maane unhone jaane ka faisla kar liya tha aur vo jo keh dete the vo karte hi the…
Ab intezaar tha to bas raat ka aur vo ghadi bhi aa hi gyi raat 11.30 baje ke qareeb mere nana aur unke kuch dost uss gali ke paas jama hue, Aur kuch dost uss road par jama hue jahan bandhe ka road khatam hota tha aur vapas ghar aane vale road se milta tha..
12 bajne mein 10 minute. baaki rhe honge aur mere Nana ne chalne ka faisla kiya ek baar fir unke doston ne mana kiya unhe roka but vo nahi maane vo aage badhe unhone Kurta aur Paijama pahna hua tha vo Dharmik Vicharon vale aadmi the Namaz Padhte the aur khuda mein yaqeen karte the vo jume(Friday) ka din tha unhone roz ki tarah raat ki Namaz padhi, kahana khaaya aur apni shart(Bet) ko poora karne ke liye nikal pade..
Raasta bilkul veeran tha door door tak koi aadmi kya janwar tak nahi nazar aata tha, Kuch aage badhe to unhein kutte dikhayi diye jo unhein dekh kar bhoonk rahe the vo chup-chaap chalet rahe tabhi unhe aisa maloom hua jaise kisi ne unke kandhe(Shoulder) par haath rakha ho, Darr se unki rooh kaanp gyi vo ruk gye lekin itni himmat nahi ho rhi thi ki peeche mud kar dekhein ki kisne haath rakha hai vo fir aage badhe ab unhe aisa lag rha tha ki jaise jaise vo apna Kadam(paanv) aage badha rhe hain,vaise vaise unka Paanv zameen mein dhans rha ho jaise kisi dal-dal mein chal rhe ho,unhein chalne mein bohat mushqil hone lagi aur darr ki to koi hadd hi nahi thi vo dheere dheere aage badhe tabhi unhein kuch bachon ke hasne ki awaaz sunayi di unhone dekha to vahan kaafi saare chote chote bachche the jo ki bilkul nange aur kaale the unka sar bada aur gol tha unn bachon ne apne daanton se mereNana ka Paijama pakad liya aur kheechne lage mere Nana ka bura haal tha vo unhein baagate lekin vo fir vapas aa jaate aur Nana ka paijama daanton se kheechne lagte, aur hanste..Tabhi aisa laga jaise kisi ne Nana ko zor se pakad liya ho aur jakad rha ho mere Nana bilkul bebas ho gye vo hil bhi nahi paa rhe the,unka dum ghutne laga saans lene mein taqleef hone lagi, Uski pakad bohat mazboot thi mere Nana ko laga jaise vo ab marr jaaenge unhone Khuda ko yaad kiya aur Dua padhni shuru ki thodi hi der mein pakad dheeli hone lagi unhein kuch raahat mehsoos hui unhe laga jaise koi Lamp liye hue unke peeche khada hua hai Lamp ki roshni se vo bachche jo nana ka paijaama kheench rhe the door bhaag gaye aur sab Normal lagne laga ..Nana aage badhe unke peeche peeche vo saaya bhi aage badha jaise unhein raasta dikha rha ho Nana ne andaaza lagaya jaise unke peeche koi lamba sa aadmi haath mein danda(stick) liye hue unke peeche-peeche chal rha hai, Nana ka darr bilkul khatam ho gya lekin unhone peeche mud kar dekhne ki himmat nahi ki vo bas aage badhte rahe aur uss jagah ke qareeb aa gye jahan unke dost pahle se khade unka intezaar kar rhe the jaise jaise vo manzil ke qareeb badh rhe the peeche se aati hui roshni kam hoti jaa rhi thi aur dande ki awaaz bhi halki hui jaati thi, Aur ek waqt aaya jab awaaz bilkul khatam ho gyi aur roshni bhi gayab ho gyi Nana ko saamne apne dost khade hue mile Nana ne ab peeche mud kar dekha unhein pata tha vahan koi nahi hoga, aur yaqeenan vahan koi nahi tha…mere Nana ne Khuda ka shuqr kiya aur apne doston ke paas gye unke doston ne dekha ki Nana ka paijama bilkul ganda hai aur neeche se kaafi had tak fata hua hai jaise kheench kar faada gya ho Nana ke chehre par darr bhi tha aur khushi bhi..
Unhone saari baatein apne doston se batayi sab hairaan ho ke sunte rahe..
Ye ghatna sun ke maine Nana se poocha ki Kya ab aapko bhooton par yaqeen hai?
Unhone ne kaha nahi!!mujhe bhooton par nahi Khuda pe yaqeen hai aur uss raat ke baad se pahle se kahin zyaada yaqeen hai…
Aaj mere Nana ke inteqaal(Death) ko 6 saal guzar chuke hain main unhein bohat miss karta hun aur shayad yahi vajah hai ki mujhe bhooton se kaafi lagaav hai unke baare mein janna, sunna,sochna, likhna acha lagta hai iss vajah se maine ye Page(Blog) banaya hai ummeed karta hun mere jaise aur log bhi honge jinhen ye pagalpan pasand hai…

Admin..

Bachche ka Sneh..

Ye baat mere Papa ne mujhe batayi thi main aapse share kar rahi hun,Bat uss waqt ki hai jab mere Papa Intermediate ka exam de rhe the unka Ghar Ram Nagar mein tha ek din ki baat hai Mere Papa Exam de kar ghar laut rahe the raaste mein kuch log dikhai diye mere Papa ruk gaye aur apni cycle side mein khadi kar di aur unki baatein sunne lage ki aakhir kya masla hai,
Vahan par ek aadmi jo gaanv ka Vaidya(Doctor) tha apne sath hui ghatna ko bata raha tha ..
Usne bataya ki raat mein jab vo apne ghar par gehri neend mein so rha tha to qareeb aadha paher beet jaane ke baad use darwaaja khat-khatane ki awaaz sunayi di usne darwaaaza khola to saamne ek aurat khadi thi vo ro rhi thi, Aurat ne kaha ki uske bête ko saanp ne kaat liya hai…
Vaidya(Doctor) ne poocha ki kahan hai tumhara Ladka?
Aurat ne bataya ki vo thodi doori par ek aam ke Baag mein hai aur Vaidya(Doctor) ko apne saath chalne ko kaha..
Vidya(Doctor) ne zaroori jadi bootiyan(Medicines) li aur uss aurat ke saath chal pada kaafi chalne ke baad Vaidya(Doctor) aurat ke saath uss Aam ke baag mein pahoncha vahan aurat ka ladka Behosh pada tha.. Vaidya(Doctor) ne fauran ilaaj shuru kiya aur Jadi Bootiyan uss ladke ke muh mein daali aur saanp ke kaatne vaali jagah se zaher choos choos kar nikaal diya Vaidya (Doctor) ko ladke ki halat dekh kar ye yaqenen ho gya tha ki ladka nahi bachega kyunki saanp ka zaher poori body mein pahonch chuka tha fir bhi Vaidya(Doctor) poori koshish karta raha kuch hi der mein ladke ki haalat theek hone lagi use hosh aa gya Vaidya(Doctor) ko yaqeen nahi hua ki ladka itni jaldi theek ho gya hai..Jab ladke ki haalat sudhar gyi to vaidya(Doctor) ne aurat se kaha ki ab tum isse ghar le jaa sakti ho…yahan se kitna door hai tumhara ghar??
Aurat ne bataya kid yahin thodi doori par hai baag ke kinaare aur Vaidya(Doctor) apne ghar ki taraf jaane laga to uss aurat ne Vaidya(Doctor) ko kapde ki ek Potli(Thaili) di,Vaidy(Doctor) ne Potli(Thaili) ye kehte hue lauta di ki iski koi zaroorat nahi hai aapka ladka bach gya yahi bohat hai…
Lekin Aurat ke bohat kahne par usne vo potli(Thaili) le li aur apne ghar aa gya…jab usne Potli(Thaili) khol kar dekhi to usmein kuch sone ke sikke the ye dekh kar Vaidya(Doctor) hairaan ho gya..usse ye baat samajh nahi aayi aur subah hote hi vo nikla aur usi baag mein pahoncha vahan koi nahi tha kuch aadmi baag ki rakhwaali kar rhe the, Vaidya(Doctor) ne unn rakhwaali karne valon se uss aurat aur ladke ke baare mein poocha aur poori ghatna batayi ..
Rakhwaali karne valon ne bataya ki kuch saal pahle paas ke gaanv mein ek aurat thi jiske ladke ko saanp ne kaat liya tha vo ladke ko lekar kisi Vaidya(Docor) ke paas jar hi thi lekin iss baag mein aate aate uss ladke ki maut(Death) ho gyi vo ladka uss aurat ka iklauta ladka tha uska iss duniya mein koi nahi tha sirf vo ladka hi tha aur isi sadme(Shock) se vo aurat Pagal ho gyi aur kuch din baad isi jagah isi baag mein jahan uska ladka mara tha uss aurat ne bhi Aatm-Hatya(Sucide) kar li…

Sabiha Firdaus,Barabanki,U.P

Khaufnaak Safar

Ye baat kuch saal purani hai uss samay main chhoti thi meri age qareeb 13 saal rhi hogi main mera bhai aur mere bade papaji train se vacations mein apne ghar se bade papaji ke ghar jaa rhe the hamari bogi mein kaafi kam log the aur agle station par hamari bogi poori tarah se khaali ho gyi raat ka waqt tha train jab Baliganj pahonchi to hamari bogi mein achanak ek boodhi aurat aayi aur hamari seat ke theek saamne vaali seat par baith gyi dekhne se uski age bohat zyaada maloom hoti thi thi vo aayi aur apna sar apne ghutno mein daal kar chup chaap baith gyi itni boodhi hone ke bawajood bhi uske baal kaale aur ghane the aur iss tarah khade the jaise ki unko support de kar khada kiya gya ho, jab train aage badhi to usne apna chehra oopar uthaya uska chehra bohat bhadda tha saare daant bahar ki taraf nikle hue the aur gande the jaise saalon se daanton ko saaf na kiya gya ho aur side ke do daant zyaada bade aur bahar ki taraf zyaada nikle hue the, maine red colour ka frock pahna hua tha vo mere frock ko ghoor rhi thi main aur mera bhai darr se kaanpne lage aur apne bade papaji se lipat gye bade papaji ne himmat se kaam liya aur humein doosri seat par le gye hum abhi baithe hi the ki achanak vo boodhi aurat fir hamare saamne vaali seat par aa kar baith gyi hum kuch nahi kar sakte the train poori speed se chal rhi thi boodhiya uthi aur zor zor se hansne lagi aur bogi mein daudne lagi vo hansti thi aur daudti thi kuch der hamari seat ke paas aa kar khadi hoti aur fir daudti aur zor zor se hansti thi vo mere paas aayi apne daant nikaal kar hansne lagi bade papaji ne apni pocket se lighter nikaala aur jalaya aag dekh kar vo peeche hat gyi bade papaji ne himmat ki aur aage badhe boodhiya ne apne bade bade nakhoon vale gande haathon ko bade papaji ki taraf karte hue kaha ki tum log jitna jaldi ho sake yahan se chale jao itna keh kar vo train ke toilet mein ghus gyi..darr ki vajah se hamara bura haal tha agle station par hum train se neeche utre aur doosri bogi mein chadh gye uss bogi mein pahle se kuch log maujood the baaki ka safar humne ussi bogi mein kiya…
Shuqr hai usne humein koi nuksaan nahi pahonchaya,Uss Ghatna ne humein bohat dara diya tha ghar aate aate mere bhai ko tez bukhaar ho gya tha main bhi bohat dari huyu thi maine isse pahle naa iske baad kabhi aisa koi darawna anubhav kiya..

Srishti Gaud,Gorakhpur